A Federación de Industria de CCOO de Galicia convoca unha concentración na Coruña para mañá xoves, 15 de decembro, ás 11 horas, coa intención de esixir un gran pacto pola industria a nivel estatal. Por esta razón, a protesta terá lugar diante da Delegación do Goberno en Galicia, situada na coruñesa praza de Ourense. CCOO-Industria informa de que esta acción reivindicativa terá lugar noutros puntos do Estado o mesmo día e apunta que é continuación da gran manifestación que tivo lugar en Madrid a mediados do verán.
O secretario xeral de CCOO-Industria, Víctor Ledo, atenderá os medios de comunicación ao comezo da concentración para expoñer a situación concreta que atravesa o sector industrial en Galicia. Así mesmo, o sindicato entregará as sinaturas que recolleu para esixir este pacto pola industria, que serán recollidas pola subdelegada do Goberno, María Rivas.
