O catedrático de Microbioloxía e decano da Facultade de Bioloxía da Universidade de Santiago de Compostela (USC) Jesús López Romalde (Ferrol, 1964) recibirá o título de Ferrolán do Ano 2022, tal e como aprobou na tarde de onte por unanimidade o pleno da corporación municipal. Romalde foi designado como experto técnico a nivel estatal para a SARS-CoV-2 polos seus traballos sobre a detección do virus en augas residuais. É tamén autor de máis de 230 artigos en revistas de divulgación científica e participou en 50 proxectos de I+D a nivel estatal e europeo. É embaixador para España da American Society for Microbiology e recibiu o Premio Internacional de Investigación Científica e Técnica ‘Enxeñeiro Comerma’ (1988), Premio Jaime Ferrán da Sociedade Española de Microbioloxía (2001) e a Insignia de Ouro da Universidade de Santiago de Compostela. Ademais, a Real Academia Galega de Ciencias acaba de entregarlle a medalla Ánxeles Alvariño González da sección de Bioloxía e Ciencias da Saúde pola súa traxectoria científica.
O pleno desta tarde tamén aprobou por unanimidade outorgar as insignias de ouro 2022 ao CEIP A Laxe de Valón, polo seu traballo na promoción dunha ensinanza que «garante o estímulo das capacidades de todo o alumnado e contribución á creación de contextos e cultura inclusivos»; ao CPR Jesús Maestro, con motivo do 75.º aniversario da súa fundación e pola súa aposta por un sistema pedagóxico innovador; á Asociación de Persoas Xordas de Ferrolterra, entidade que celebra o seu 50.º aniversario na procura da eliminación das barreiras comunicativas; ao Abeconsa Basketmi, pola súa traxectoria e os seus éxitos deportivos ao lograr o primeiro posto na Primeira División de baloncesto en cadeira de rodas e o ascenso a División de Honra, e, por último, a Rafael Pillado, con motivo do 50.º aniversario dos sucesos do 10 de marzo de 1972 e como homenaxe á súa loita sindical e política na defensa das liberdades e do traballo digno.
As distincións serán entregadas o vindeiro 7 de xaneiro no Teatro Jofre no transcurso da tradicional cerimonia institucional que o Concello organiza con motivo da festividade de San Xiao.
