Dende o pasado venres, e tras a sinatura da escritura de compra, o Concello de Pontedeume pasa a ser o propietario dun solar na rúa Empedrado, que será habilitado para albergar un aparcamento. A parcela conta con 1.000 metros cadrados, o que permitirá ao Concello habilitar aproximadamente 40 prazas de estacionamento, reservando unha parte delas para residentes. Esta adquisición permitirá ademais cumprir cunha vella demanda veciñal, a de recuperar a Praza de San Roque para os peóns. Deste modo, retiraranse os vehículos estacionados no seu interior e gañaranse novas prazas con respecto a esta localización, no estacionamento que se construirá no Empedrado.
Ademais, grazas á cesión de uso ao Concello por parte dos propietarios dunha parcela que se atopa nas inmediacións do Cemiterio Municipal, nas vindeiras semanas procederanse a habilitar outras 30 prazas de aparcamento nesa zona. Neste senso, actualmente dende o Goberno Local continúase coas negociacións encamiñadas a adquirir dúas parcelas máis noutras zonas do casco urbano, tamén para ampliar as prazas de aparcamento. Con estas xestións, o Concello de Pontedeume busca crear de aquí ao remate da lexislatura en torno a 150 novas prazas de aparcamento nas inmediacións do casco urbano.
