O Concello de Ferrol publicou onte no seu perfil da plataforma de contratación do sector público o anuncio de licitación electrónica do aglomerado de tramo de camiño C-112 e aglomerado de tramos de Camiño do Casal. As propostas deberán presentarse de forma telemática a través da plataforma de contratación antes das 23.59 horas do próximo 6 de outubro. O orzamento base de licitación é de 34.355,98 euros e a obra conta cun prazo de execución dun mes.
O voceiro municipal e concelleiro de Urbanismo, Julián Reina, anunciou o pasado luns tras a Xunta de Goberno Local a aprobación do expediente de contratación do proxecto, que se executará na parroquia de Mandiá. Dita actuación, incluída no POS+2018 -Plan de Obras e Servizos- da Deputación da Coruña, consiste no pavimentado do viario sobre firme xa existente —na actualidade moi deteriorado—, o fresado do pavimento, a limpeza da súa superficie, a reparación de fochancas, o saneamento do firme, a formación e/ou perfilado de cunetas e a sinalización vertical e horizontal. Actuarase nunha superficie de 1.681 metros cadrados.
