O Destacamento da Agrupación de Tráfico da Garda Civil de Ferrol investigou fai uns días a un condutor como presunto autor dun delito contra a seguridade viaria. Os feitos ocorreron cando unha patrulla da mencionada unidade detectou a esta persoa que carecía de permiso de condución en vigor -o cal xa coñecían pola sentenza firme dun Xulgado de Barcelona-, conducindo un vehículo na a altura do quilómetro 36 da autoestrada AP-9 F, no termo municipal de Fene.
Os compoñentes da patrulla procederon a deter o vehículo e comprobar a documentación do mesmo e do seu condutor, e tras a confirmación das sospeitas este mesmo terminou sendo investigado como presunto autor dun delito contra a seguridade viaria, poñéndoo ao dispor do Xulgado de garda de Ferrol.
Un condutor multirreincidente, dous delitos na mesma semana
Esta persoa fora localizada o día anterior por unha patrulla da mesma unidade cando conducía un vehículo en Cerdido, abandonando o mesmo ao verse sorprendido e iniciando a fuga a pé. Un pouco máis tarde terminaría sendo localizado polos gardas civís agochado debaixo dun vehículo no estacionamento do colexio A Barqueira.
Posteriormente a Garda Civil procedeu á súa investigación como presunto autor dun delito contra a seguridade viaria, poñéndoo ao dispor do Xulgado de Instrución de Ortigueira. Finalmente e a pesar de non ser o titular do vehículo co que foi sorprendido conducindo, debido á reiteración dos delitos co mesmo turismo e tras amosar un absoluto desprezo ás condenas xudiciais que está a cumprir, os axentes procederon ao comiso xudicial deixando o respectivo vehículo no depósito municipal que o Concello de Ferrol posúe na devandita cidade.
