A Mariña Lucense invita a percorrer os seus paisaxes e coñecer o seu patrimonio cunha nova edición de ‘Plans con Corazón’, un programa de visitas guiadas que permitirá descubrir diferentes recunchos dos 16 concellos que forman parte deste xeodestino. A iniciativa desenvolverase entre o 16 de setembro e o 14 de novembro e combinará natureza, historia, etnografía, gastronomía e artesanía.
A proposta, organizada pola Mancomunidade de Concellos da Mariña Lucense e apoiada pola Deputación, chega á súa sétima edición cun total de 16 rutas e visitas guiadas. As actividades estarán conducidas por guías locais que achegarán aos participantes diferentes perspectivas sobre o territorio.
De pozos e pazos a aves e arqueoloxía
O programa ofrece propostas moi diferentes para coñecer a comarca. Entre elas están a visita ao Pozo do Lexoso, en Ribadeo, o percorrido polo Pazo de Carrocide, en Alfoz, ou a observación de aves desde a Lagoa dos Patos, en Barreiros.
As rutas tamén permitirán descubrir as pinturas medievais da igrexa da Vila do Medio, en Burela, coñecer a tradición da Faba de Lourenzá ou participar nunha ruta xeolóxica pola contorna das praias de San Román e Arealonga, no Vicedo.
Un programa que busca atraer visitantes durante todo o ano
A Deputación achega 25.000 euros á Mancomunidade para apoiar ‘Plans con Corazón’, dentro do convenio que ambas entidades manteñen para impulsar diferentes iniciativas de promoción turística na Mariña.
Durante a presentación, a presidenta da Deputación, Carmela López, destacou o valor de coñecer a comarca da man de persoas que traballan e coñecen o territorio, así como a importancia de consolidar un modelo turístico que vaia máis alá da tempada estival.
A pasada edición contou con máis de 250 participantes, procedentes tanto da Mariña e doutras zonas da provincia como de diferentes puntos de Galicia y de comunidades como Asturias, León, Madrid, Valencia ou Zaragoza. As prazas chegaron a esgotarse e o programa obtivo unha valoración de 9,4 sobre 10 entre as persoas participantes.
Como participar?
As prazas para as diferentes actividades son limitadas e teñen un prezo de 5 euros por persoa, 9 euros para parellas e 15 euros para grupos. A tarifa inclúe a visita guiada e os seguros de responsabilidade civil e accidentes.
A programación completa e as inscricións están dispoñibles nas plataformas habilitadas pola organización.