Endesa doou outras 20.000 máscaras á Xunta de Galicia, que se suman ás 50.000 entregadas a pasada semana e que forman parte do lote adquirido pola compañía ante a emerxencia sanitaria sen precedentes xerada polo Covid-19. “Nesta ocasión, van destinadas á rede autonómica de residencias de persoas maiores, como mostra do noso apoio a ese segmento de poboación e moi especialmente a quen se ocupa do coidar aos anciáns”, declarou o director xeneral territorial de Endesa, Miguel Temboury.
Xunto ás 20.000 máscaras para a Consellería de Política Social, Endesa entregou 2.500 máis ao Concello das Pontes. Igual número recibiu o Complexo Hospitalario Universitario de Ferrol, ao que a propia central térmica pontesa fixera, nos primeiros días da crise, unha doazón de urxencia de equipos de protección individual que estaban dispostos para o persoal da planta.
As máscaras saíron hoxe da central das Pontes a un almacén da Xunta en Santiago, á casa do concello pontesa e ao centro hospitalario ferrolán. O director xeneral territorial de Endesa Noroeste, Miguel Temboury, referiuse á doazón manifestando que “a compañía deseñou un plan de actuación moi ambicioso, no que Galicia ten a consideración que se corresponde coa especial vinculación de Endesa con esta comunidade. Nesta ocasión tamén quixemos salientar nosa especial relación coas Pontes e Ferrolterra reservando senllas partidas que irán directamente para a comarca”.
Esta iniciativa forma parte do Plan de Responsabilidade Pública que deseñou a empresa, dotado con 25 millóns de euros, para axudas directas á compra de material, condicións especiais de subministración eléctrica e doazóns co obxecto de paliar as principais necesidades sanitarias e sociais provocadas pola crise sanitaria. A compañía proporciona así apoio aos servizos públicos poñendo á súa disposición materiais, vehículos e equipos que se poidan requirir para abordar esta emerxencia epidemiolóxica.
