Este Samaín chega a Pontedeume por todo o alto con diferentes actividades para tódalas idades. O percorrido “Truco ou Trato”, o concurso de disfraces en colaboración coa hostalaría, a Festa Infantil de Samaín e “O pasadizo do terror da Árbore da Bruxa” son algunhas das propostas. Desde o ano 2015, o Concello de Pontedeume celebra a súa Festa de Samaín, unha celebración xa consolidada que ofrece unha completa proposta de iniciativas para a veciñanza. Nesta edición, propóñense diferentes actividades que se desenvolverán dende o venres 28 de outubro á noite do luns 31.
Deste modo, este venres 28 de outubro, de 18:00 a 20:00 as máis pequenas e pequenos poderán participar no percorrido do «Truco ou trato», con saída desde o Centro de Maiores. Na actividade visitaranse os diferentes establecementos e rúas comerciais do casco histórico. Durante a noite do sábado, 29 de outubro, os disfraces serán os protagonistas cunha nova iniciativa que xurde grazas á colaboración dos establecementos de hostalaría. Os locais avaliarán as caracterizacións máis terroríficas que visiten os seus locais, en función da orixinalidade, dificultade de elaboración, vistosidade e posta en escena, optando a diferentes premios. Todos os establecementos interesados en participar poden inscribirse no rexistro municipal ou a través da sede electrónica.
O luns, 31 de outubro, o escenario trasládase á Alameda de Rajoy, coa tradicional Festa Infantil de Samaín que comezará ás 17:30. Nesta celebración a rapazada poderá gozar do Espectáculo de Animación Cantabaila, obradoiros de maquillaxe, actividades de elaboración de doces en forma de arañas, caramelos terroríficos, entre outras propostas. Durante a festa, os participantes poderán gozar do tradicional magosto e dos postos de chocolate. A Festa de Samaín estenderase ata as 20:00, dando paso a unha das iniciativas máis innovadoras desta edición.
Desde as 20:30 nos Xardíns de Lombardero estará aberto «O pasadizo do terror da Árbore da Bruxa», que se realizará en colaboración coas asociacións teatrais eumesas. A contorna desta árbore, coñecida polas súas raíces aéreas en forma de barbas como “A Árbore da Bruxa”, será o lugar onde se desenvolverá esta actividade. As persoas participantes poderán percorrer durante a noite os longos corredores deste xardín que estarán repletos de néboa, sustos e sorpresas para desfrute dos participantes máis valentes que se atrevan a introducirse.
Por último, como vén sendo habitual, durante estes días diferentes puntos do casco histórico de Pontedeume, como o Torreón dos Andrade ou a entrada aos xardíns contarán con diferentes esculturas sobrecolledoras que ambientarán durante estes días a vila dos Andrade.