O Concello de Lalín vén de presentar unha moción que se debatirá no seu próximo pleno de agosto onde queren pedir á Xunta que inicie os trámites para que o cocido galego sexa declarado Ben de Interese Cultural (BIC), dentro da categoría de patrimonio cultural inmaterial.
O cocido galego triunfa por todo o territorio pero está claro que o de Lalín esperta moito interese tanto dentro como fóra de Galicia. Tal e así que a súa Feira do Cocido foi declarada Festa de Interese Turístico Internacional no 2020. Esta festa está a piques de celebrar o seu sesaxésimo aniversario, no 2028 e dende o Concello queren que, un prato como o cocido galego, tan importante para a nosa gastronomía, goce de este distintivo. «Permitiría reforzar a súa protección, documentación, transmisión e posta en valor, garantindo a preservación dos seus elementos tradicionais», afirma o goberno lalinense.
Unha petición para a Xunta
A través desta moción, pídenlle á Xunta, a través da Consellería de Cultura, Lingua e Xuventude, que inicien o proceso para declarar o Cocido Galego como BIC. Demandan a incoación e tramitación dun expediente que acade este fin «promovendo a elaboración da documentación necesaria, de conformidade ao establecido na Lei 5/2016 do patrimonio cultural de Galicia». De feito, o concello xa anunciou que de aceptarse isto, ofrecen a súa colaboración na preparación e envío da documentación para a memoria técnica. Así mesmo queren que durante a elaboración desta os representantes das distintas universidades galegas, especialistas en patrimonio cultural, e representantes do sector gastronómico, estén presentes.
Un prato con todo o necesario
O goberno lalinense ten claro que o prato cumpre con todos os requisitos para a declaración de BIC «ao integrar tradición, identidade, sociabilidade e transmisión xeracional». Destacan que «está vinculado a prácticas tradicionais como a matanza do porco; posúe unha forte dimensión identitaria e simbólica; integra unha rica diversidade territorial dentro dun marco común, mantén unha transmisión interxeracional continuada e constitúe unha manifestación cultural viva e socialmente recoñecida».
De feito, apuntan que o cocido galego ten unha tradición moi estudada e documentada por investigadores, antropólogos, etnógrafos ou escritores como Vicente Risco, Xaquín Lorenzo Xocas, Ramón Otero Pedrayo ou Álvaro Cunqueiro.
O Concello xa está pensando no futuro e pensan que a declaración de BIC do cocido galego facilitaría «promover unha candidatura á lista representativa do Patrimonio Inmaterial da Humanidade«. Consideran que é unha oportunidade clave para «recoñecer e protexer unha parte esencial da nosa identidade colectiva, da nosa memoria histórica e os coñecementos herdados ao longo de séculos».