O Concello de Cariño está a aplicar medidas especiais ante a situación extraordinaria derivada da crise sanitaria xerada pola expansión do COVID-19. O alcalde, José Miguel Alonso Pumar, comunicou que durante a vixencia do Estado de Alarma non se cobrará ningún imposto ou taxa municipal aos veciños e veciñas do municipio.
Así, non se cobrarán ata que se restableza a normalidade taxas como as das terrazas dos bares, o Punto de Atención á Infancia e a piscina municipal. En todos eles os servizos citados aplicarase un prorrateo cos días de marzo que os servizos puideron estar abertos ao público para, a partir do día 13 deste mes, suspender a cobranza. Os novos recibos do servizo de auga e lixos, así como o imposto de vehículos, tamén se conxelaron en coordinación coa Deputación da Coruña como mínimo ata superar o 30 de abril. As datas de continuación fixaranse chegado o momento.
Doutra banda, e no que ao recibo de auga e lixo refírese, o goberno local decidiu ampliar ata o 30 de abril o prazo para facer efectivo o pago do recibo correspondente ao último cuadrimestre de 2019 para todas aquelas persoas que aínda non o fixeran efectivo de forma presencial ao non contar con domiciliación bancaria. Este período de cobranza comezara o 1 de febreiro e finalizaba o 31 de marzo, polo que no momento de decretarse o Estado de Alarma boa parte dos contribuíntes xa satisfixeran o pago.
José Miguel Alonso Pumar destacou que “estas medidas pódense ampliar no tempo dependendo da evolución da crise sanitaria que vivimos” e aclarou que “son medidas lóxicas para axudar a superar esta situación excepcional aos nosos veciños e veciñas xa que, na maioría dos casos, non poden facer uso dos servizos”.
Discussion about this post