Diante do inicio da desescalada do confinamento, o alcalde de Ortigueira, Juan Penabad Muras recomendou a veciñanza que se adopten medidas de precaución como transitar polas beirarrúas nun único sentido, «xa que deste xeito facilítase o cumprimento do mantemento da distancia de seguridade».
“Queremos darlle especial importancia á circulación dos nosos veciños e veciñas agora que se atoparán e cruzarán polas rúas”, di Penabad Muras, que lembra que as beirarrúas en Ortigueira non son tan anchas como nas ciudades de gran tamaño e polo tanto resultaría difícil respectar a separación coa persoa que veña camiñando de fronte. A intención é “reducir ao máximo os encontros ou contactos en distancias curtas”, subliña, polo que a proposta é que se utilicen as beirarrúas para camiñar na mesma dirección na que o fan os vehículos pola calzada, é dicir, circulando pola situada á dereita no sentido da marcha.
Para facilitar aínda máis o seu cumprimento, nas zonas nas que habitualmente hai máis afluencia de persoas colocarase sinalización no comezo de cada beirarrúa, marcando o sentido da circulación e lembrando a distancia que hai que respectar co resto dos camiñantes, tamén cos que avanzan na mesma dirección.
Protección para os establecementos
Por outra banda, Juan Penabad anunciuo que o Concello ten dispoñible material de protección para as persoas que traballan nos negocios cara ao público e que poderán abrir as súas portas desde o 11 de maio. Os teléfonos 981 402 542 e 604 002 167 funcionan para recibir peticións de material de protección (máscaras e guantes) para a atención nos establecementos comerciais.
O alcalde expresou o seu desexo de que os negocios locais poidan superar a crise canto antes e para iso pide á veciñanza que realice as súas compras no comercio de Ortigueira, sempre cumprindo as medidas de seguridade.
