O alcalde de Foz, Fran Cajoto, remitiu este mércores un escrito ao conselleiro de Sanidade no que pide explicacións urxentes sobre a posible supresión do servizo de urxencias do centro de saúde os sábados pola mañá. A preocupación do rexedor xorde tras unha información publicada por La Voz de Galicia, que apunta a que a ampliación de horarios nos Puntos de Atención Continuada (PAC) podería deixar a Foz sen atención de urxencias en fin de semana.
Cajoto tamén trasladou a mesma consulta ao xerente da área sanitaria de Lugo, A Mariña e Monforte de Lemos, advertindo de que a medida suporía “un novo agravio” para o municipio. O alcalde lembra que Foz, con máis de 10.300 habitantes censados e picos de ata 30.000 persoas no verán, é o sexto concello máis poboado da provincia e o segundo da Mariña, pero continúa sen PAC propio, ao contrario que localidades con menor poboación.
O rexedor repasa no seu escrito unha longa lista de municipios da área sanitaria que si dispoñen de PAC, desde Viveiro e Ribadeo ata Meira, Navia de Suarna ou Pedrafita do Cebreiro. “Foz segue sendo unha excepción”, lamenta, e lembra que a falta dun PAC só se compensaba cun médico reforzo no verán —servizo suprimido— e coas urxencias dos sábados pola mañá, agora en risco.
O alcalde tamén critica a eliminación dun técnico de emerxencias sanitarias na ambulancia medicalizada, unha decisión que, segundo afirma, deixou o servizo “infra-dotado” malia a demanda social e política para recuperar a dotación completa. A isto súmase que, desde o 1 de xaneiro deste ano, Foz deixou de contar con farmacias de garda nocturna debido á ausencia dun PAC, o que supón “unha perda dun servizo esencial”.
Cajoto asegura que o Concello non recibiu información oficial sobre o estado dos trámites para a ampliación do centro de saúde e reclama que se teña en conta a súa adaptación como futuro Punto de Atención Continuada. O alcalde formula, ademáis catro peticións directas ao conselleiro: que Sanidade confirme ou desminta a supresión das urxencias dos sábados; que, de ser certa a información, se modifique o decreto para manter o servizo; que se inicien os trámites para dotar Foz dun Punto de Atención Continuada; e que se restitúan todos os servizos sanitarios suprimidos desde 2005
Cajoto advirte de que o Concello apoiará “todas as accións políticas e cidadás necesarias” para evitar o que considera unha discriminación na atención sanitaria. E conclúe pedindo á Xunta que rectifique e teña en conta “as necesidades reais da poboación focega”.
