Éxito tras éxito, O Xoán segue a abrirse paso no eido musical… e non é para menos. Este martes, o actor e músico de Castro de Rei está de estrea cunha nova peza audiovisual que amplía o universo do seu recente single de pop electrónico en galego. Fállame a chola aposta por unha estética camp, emocional e moi performativa, consolidando unha liña creativa na que música e identidade van da man nun momento especialmente simbólico, ás portas do mes do Orgullo.
Facer da crítica unha loita pola identidade
O tema parte dunha reflexión sobre o desexo, as contradicións persoais e a presión social por encaixar en determinados modelos. A partir dunha expresión usada tradicionalmente como crítica ou reproche, o artista reapropíase dela e convértea nun xesto de afirmación persoal, ligado á liberdade afectiva e á construción dunha identidade propia.
No plano visual, o videoclip móvese entre o exceso, o humor e a vulnerabilidade, cunha forte presenza da linguaxe drag como elemento central. O Xoán conta con drag queens galegas: Moira Lutar, Yasmine Lutar, Syndra, Liteah, La Kristopher e Ashley Ferreira, que participan na peza acompañándoo nun proceso simbólico de transformación, no que a performance funciona tamén como espazo de expresión e resistencia.
A rodaxe contou ademais co apoio da Lugo Film Office da Deputación de Lugo, que se encargou de localizar os espazos nos que se desenvolveu a gravación. O equipo utilizou instalacións do Centro de Formación Audiovisual de Lugo, que serviu como escenario para parte da posta en escena do proxecto, reforzando a conexión entre a creación musical e os recursos audiovisuais do territorio.
O Xoán, o seu proxecto máis persoal
O Xoán é o proxecto musical do actor e músico Xoán Fórneas, natural de Castro de Rei. Unha nova etapa profesional que nace tras un cambio vital que o leva de volta ás súas orixes no rural lucense, desde onde comeza a construír unha proposta persoal dentro do pop electrónico en galego, marcada por unha aproximación honesta, emocional e contemporánea.
Neste percorrido inicial destaca o seu primeiro single, Ferido, publicado en novembro de 2025. Unha peza de pop electrónico que mestura rito, raíz e unha estética camp, convertendo a dor nun espazo luminoso, irreverente e cunha beleza case brutalista. A canción funciona como porta de entrada a un universo creativo no que o íntimo se transforma en espectáculo, e no que a emoción, mesmo na ferida, mantén sempre o movemento e o carácter festivo.
