O Conselleiro de Economía, Emprego e Industria, Francisco Conde, será un dos representantes da Xunta de Galicia na Mesa da Transición Ecolóxica que se celebrará nas Pontes o próximo 10 de marzo e na que estarán presentes tamén representantes do Concello e unha delegación do Goberno Central. O titular da Xunta, explicou onte que a intención do executivo galego é reclamarlle ao Ministerio de Transición Ecolóxica que «adopte as medidas que permitan que se reactive» a planta térmica de Endesa e, ao mesmo tempo, pedirlle á compañía que «adquira o compromiso para que se poida reactivar».
O conselleiro sinalou tamén que esta reapertura «non é viable» se non se aplican mecanismos fiscais como a eliminanación do céntimo verde, unha primeira medida que considera «imprescindible». Conde tamén explicou que reclamarán ao Goberno de Pedro Sánchez a esixencia de conseguir máis fondos da Unión Europea para a transición enerxética. Non en van, España recibiu para transición enerxética 300 millóns de euros, fronte aos case 900 millóns de Alemaña e aos 2.000 millóns de Polonia.
A Xunta acordou coa deputación na última reunión de traballado mantida en As Pontes a creación dunha Oficina de Reindustrialización para apoiar e coordinar proxectos empresariais que xurdan para garantir o futuro industrial da comarca, ademais de garantir o apoio daquelas iniciativas relacionadas coa ampliación do chan industrial no concello.
