O Concello de Pontedeume adquiriu un cargamento de 12.000 mascarillas, tras a realización de «numerosas xestións nas últimas datas polas dificultades existentes no mercado nacional e internacional», explicaron dende o goberno local. A este número hai que unir as que o concello recibe da Xunta e da Deputación da Coruña para o seu uso durante o Estado de Alarma por parte do persoal municipal.
O concello recibirá o material comprado entre finais de abril e principios de maio e repartirá as 12.000 mascarillas entre os veciños e veciñas, deixándoas en cada domicilio xunto a un escrito cunha serie de recomendacións. Dende o goberno muncipal informan de que «as mascarillas adquiridas polo Concello de Pontedeume cumpren con todas as garantías internacionais e da OMS para evitar a transmisión de axentes infecciosos e o contacto con fluidos potencialmente patóxenos».
“A día de hoxe, as farmacias non contan con material suficiente e desde o Concello de Pontedeume queremos contribuír á prevención de novos contaxios cando remate o actual confinamento”, afirma o alcalde, Bernardo Fernández Piñeiro.
