O comité de empresa de Navantia Ferrol anunciuo a última hora deste mércores que desde mañá volverá a permitir a entrada dos traballadores do estaleiro. Este anuncio faise trala acción de protesta realizada na mañá deste mércores cando impediron aos operarios do primeiro turno acceder aos seus postos de traballo como medida de presión ante «a falta de protocolos de seguridade» fronte ao Covid-19.
Tras unha reunión mantida entre os representantes dos traballadores e a dirección da empresa pública, chegouse ao compromiso por parte de Navantia de realizar melloras nos protocolos establecidos. Entre elas, explicaron desde o comité, poder garantir as distancias mínimas de seguridade nalgunhas estancias do estaleiro como os vestiarios, onde os traballadores están desprotexidos. Ademais tamén vaise incrementar o servizo de limpeza e hixienización nas instalacións, especialmente nos talleres e nos vestiarios.
Actualmente hai case un milleiro de traballadores reincorporados aos seus postos, entre os operarios das auxiliares e os de Navantia, que traballan nos dous buques AOR da armada australiana. A previsión da dirección do estaleiro é que o próximo luns 25 de maio se incorpore o 25% restante da plantilla, pero desde o comité advirten de que só aceptarán estas reincorporacións se se cumpren estritamente tódolos protocolos. «Revisaremos persoalmente que se cumpren as medidas esixidas», explicaron os sindicatos.
