Cabanas acollerá este sábado, 29 de outubro, un obradoiro de deseño e moda inspirado na contorna, enmarcado dentro do proxecto “Residencias Creativas no Camiño”. Os talleres están dirixidos a todo tipo de públicos, aínda que principalmente están enfocados a profesionais estudantes do ámbito creativo, e teñen aberto o seu prazo de preinscrición. As persoas interesadas poden anotarse a través do formulario dispoñíbel na web cabanas.gal. As prazas son limitadas.
Será nun autobús singular de tipo inglés de dous pisos rotulado para a ocasión, que estará situado no aparcadoiro do Parque do Areal, entre as 10.00 e as 14.00, e de 16.00 a 20.00 horas. O obradoiro, de balde, será impartido pola deseñadora luguesa Melania Freire, e permitirá descubrir as novas tendencias artísticas que se están a desenvolver en Galiza, co Camiño de Santiago como fío condutor e principal fonte de inspiración.
Melania conta con experiencia nos ámbitos de moda, audiovisuais, artes escénicas, de docencia e investigación. Ademais, recibiu numerosos premios polos seus traballos, como o Mercedes-Benz Fashion Talent ou a Samsung EGO – MBFW Madrid. Residencias Creativas no Camiño chega a Cabanas tras o seu paso por Begonte, Muxía, e O Pino. Logo do seu paso por Cabanas, este sábado, achegarase ao concello de Vilar de Barrio.
