As mascotas das Pontes xa contan cun novo espazo pensado especificamente para o seu exercicio, lecer e socialización. O Concello vén de poñer en funcionamento un parque canino de 775 metros cadrados na Canle IV, acondicionado para que os cans poidan correr, xogar e interactuar con outros animais nun contorno seguro.
A actuación supuxo un investimento de preto de 20.000 euros e inclúe tanto a adecuación do terreo como a instalación dun peche perimetral e diferentes equipamentos de adestramento.
Sete elementos para poñer a proba as mascotas
O recinto conta con sete elementos de adestramento e enriquecemento canino: túnel, balancín, salto de altura, salto de lonxitude, empalizada, pasarela e roda.
Os equipamentos están pensados para cans de diferentes tamaños e características e permiten traballar capacidades como o equilibrio, a coordinación, a axilidade, a forza ou a orientación, combinando a actividade física coa estimulación mental.
Un espazo adaptado e seguro
Para acondicionar o parque foi necesario preparar e nivelar o terreo, achegar zahorra e instalar un sistema de drenaxe, traballos realizados con medios propios do Concello. Tamén se colocou un peche perimetral para garantir a seguridade dos animais e facilitar o control dos accesos.
O novo equipamento busca ofrecer ás familias con mascotas un lugar axeitado para que os animais poidan desenvolver actividade física e relacionarse con outros cans, ao tempo que se favorece unha convivencia responsable no espazo urbano.
Desde o Concello lembran ademais a importancia de manter limpo o recinto, respectar as normas de uso e garantir o respecto tanto aos animais como ao resto das persoas usuarias.