O Lago das Pontes volverá converterse este venres nun dos puntos de encontro do verán no municipio coa celebración dunha nova edición do Mar de Lecer. A proposta reunirá durante toda a tarde e noite música en directo, espectáculos de rúa, animación e o tradicional espectáculo pirotécnico nunha contorna pensada para gozar en familia ou con amizades.
A programación arrancará ás 18.00 horas e prolongarase ata ben entrada a noite, cunha sucesión de actividades que buscan combinar cultura, lecer e espectáculo ao aire libre.
Unha tarde de espectáculos e música
A primeira proposta chegará ás 18.00 horas, coa actuación de Fredy Circanelo, que dará o pistoletazo de saída á xornada.
Ás 20.00 horas será a quenda de Troula Animación, que presentará o espectáculo Psicodelia. A música tomará despois o protagonismo ás 21.30 horas coa actuación de Galifunk Brass, dentro da súa Xira 26.
O programa chegará ao seu momento máis esperado ás 23.00 horas co espectáculo pirotécnico, unha das citas tradicionais do Mar de Lecer.
Xusto despois, ás 23.15 horas, a sesión de DJ Chiña poñerá o peche musical á xornada e prolongará a festa no entorno do lago.
Unha cita para vivir o verán no lago
O evento desenvolverase integramente no Lago das Pontes, aproveitando a contorna natural como escenario dunha programación que combina propostas culturais e de lecer para diferentes idades.
O cartel desta edición leva ademais selo local: a imaxe do Mar de Lecer foi deseñada polo artista pontés Luis Torrente, encargado de poñerlle rostro a unha das principais citas do verán no municipio.
Con música, animación e fogos artificiais, o Mar de Lecer volverá ofrecer este venres unha oportunidade para desfrutar dunha noite de verán ao aire libre nun dos espazos máis singulares das Pontes.