A semana pasada comezaron a funcionar nas bases da Policía Local, do Corpo de Bombeiros e de Protección Civil un total de dez aparatos ozonizadores para a desinfección tanto das dependencias coma dos vehículos que emprega o persoal de seguridade e emerxencias. Estes equipos foron adquiridos polo Concello tras o inicio da epidemia de coronavirus para incrementar todo o posible as medidas hixiénicas contempladas no protocolo que se puxo en marcha dende os primeiros días da crise.
Así, ademais dos traballos diarios de limpeza dos vehículos e da periódica desinfección que está a levar a cabo unha empresa especializada, sete dos novos aparatos, con capacidade para tratar áreas de ata 15 metros cadrados, están destinados a ese cometido. Os outros tres, cun caudal de 160 metros cúbicos, son capaces de hixienizar estancias de 50 metros cadrados en 25 minutos, e estanse poñendo en funcionamento nas dependencias do cuartel da Policía Local, do parque de bombeiros e da base de Protección Civil.
O Concello tamén acordou a cesión de dous destes aparatos de desinfección por ozono ás asociacións de taxis para que poidan hixienizar os seus vehículos. Hoxe mesmo, os dous edís fixéronlle a este colectivo entrega deles, así como de 150 novas máscaras de protección.
