O Goberno municipal de Mugardos iniciou os trámites para rescindir o contrato de mutuo acordo coa empresa redactora do Plan de Urbanismo (PXOM). Juan Domingo de Deus, como responsable da área de urbanismo tomou a decisión de acabar a relación con esta empresa, tras constatar os nulos avances producidos no documento desde 2016, cando el abandonara a alcaldía pola moción de censura promovida por EU, BNG e a extinta ICM.
“O tema do novo Plan de Urbanismo leva parado en Mugardos máis de 3 anos, e nos últimos 10 anos esta empresa non logrou sacar adiante nin sequera o trámite da aprobación inicial do documento. O plan de urbanismo vixente en Mugardos é do século pasado, isto é unha anomalía que dificulta a vida dos veciños cada vez que solicitan unha licenza de obra ou unha segregación de parcelas”.
Desde o concello informan da intención do novo goberno municipal de impulsar un concurso público aberto e transparente para a redacción dun novo plan, nos que primarán os criterios de solvencia profesional e experiencia na redacción de plans de ordenación urbanística, co obxectivo de axilizar o proceso de elaboración do novo plan.
De Deus confirma que a aprobación do plan realizarase coa participación da veciñanza, e confía en que o procedemento de preparación do documento conte coa colaboración do resto de grupos municipais, dada a importancia do mesmo para o futuro do municipio.
