O Concello de Narón porá en marcha a partir do vindeiro luns un plan especial de desinfección de centros de ensino. A iniciativa levarase a cabo coincidindo co restablecemento, por parte da Consellería de Educación, do período para presentar as solicitudes de admisión en segundo ciclo de Infantil, Primaria, ESO, e Bacharelato.
«O persoal do Speis será o encargado de realizar estes traballos de reforzo da desinfección, co fin de que as instalacións, tanto no exterior como no interior, reúnan todas as garantías sanitarias tanto para o persoal dos centros como das familias que se acheguen para realizar os trámites de matriculación”, asegurou a alcaldesa Marián Ferreiro.
Así mesmo, durante este prazo tamén se entregarán cubrebocas nos centros para que se distribúan entre os pais e nais que se despracen aos colexios e que os precisen. “Repartiremos o luns os primeiros lotes de cubrebocas realizados por persoal voluntario con material doado por particulares e empresas e no caso de que se esgoten e que así nolo comuniquen enviaremos máis lotes ao centro para que ninguén quede sen eles”, apuntou Ferreiro.
