Ata 26 homes e mulleres de todas as parroquias de Valdoviño integran o grupo de voluntariado impulsado polo Concello para facer fronte ao coronavirus axudando a quen máis o precisa. Son estudantes de psicoloxía, veterinaria, militares, farmacéuticos ou autónomos.
Participan nos catro programas que o goberno local puxo en marcha durante esta crise sanitaria. A través de o programa «Axuda alimentos», encárganse de recoller os pedidos en tendas e súpers e achegalos aos domicilios de persoas maiores que viven soas ou que se atopan en situación de vulnerabilidade. O mesmo ocorre en «Menciñas», no que tamén contactan coas farmacias, envían imaxes das tarxetas sanitarias para testar os medicamentos, recollen e trasladan.
«Ao outro lado da liña» é un programa de atención telefónica a través do cal os nosos e nosas voluntarios e voluntarias conversan con veciños e veciñas que precisan algo tan simple e vital como falar con alguén.
E «Traballo de Campo» é unha nova liña de actuación que arranca esta semana cun obxectivo claro: detectar as necesidades das persoas maiores de 80 anos. Para iso, os voluntarios percorrerán todas as nosas parroquias para interesarse por aqueles recursos que precisan dende o punto de vista social ou económico a raíz da situación xerada polo estado de alarma. A información recopilada darase traslado a Servizos Sociais para así tentar dar resposta ás necesidades.
