O Concello de Valdoviño vén de establecer unha reordenación temporal no tráfico na contorna da praia de Pantín co obxectivo de mellorar a mobilidade e evitar os colapsos ante a elevada afluencia de visitantes ao ABANCA Pantín Classic Galicia Pro. As medidas durarán dende hoxe 27 de agosto ata o domingo 30.
O novo dispositivo establece a dirección única: sentido O Ariño entre a igrexa de Pantín e O Ariño; sentido Beceiros entre O Ariño e Beceiros; sentido O Rodo entre O Ariño e O Rodo; sentido As Traves entre As Traves e O Freixo; e sentido Cotellón entre O Cotellón e O Freixo.
Ademais, o acceso dende Marnela de Arriba ata o lugar de O Rodo será de dobre dirección ata o cruce coa estrada da costa e, a partir de aquí, quedará prohibido o acceso ata a zona de Ariño.
Doutra banda, os vehículos que superen os sete metros veránse dobremente afectados pois dende as 10:00 ata as 22:00 horas non poderán circular polas vías sinaladas.
O Concello asegura que estas medidas buscan facilitar a circulación e previr os problemas de tráfico durante unha das principais citas deportivas do verán en Valdoviño.