A Deputación de Lugo destinará preto de 1,5 millóns de euros á mellora da rede provincial de estradas e á modernización do Parque Móbil. O investimento permitirá actuar en oito vías dos concellos de Xermade, Paradela, Taboada, Palas de Rei, Friol e Chantada, ademais de reforzar os medios destinados ao mantemento das infraestruturas.
Máis de 13 quilómetros de estradas en obras
Entre as actuacións aprobadas figura a licitación de dous proxectos por máis de 537.000 euros. En Xermade investiranse 249.399 euros para acondicionar diferentes treitos de catro estradas que conflúen no núcleo urbano: a LU-P-2201 e o seu ramal, a LU-P-2203, a LU-P-2205 e a LU-P-2213. As obras incluirán melloras na drenaxe, renovación do firme con aglomerado en quente e nova sinalización.
En Paradela, a Deputación destinará 287.702 euros á rehabilitación de catro quilómetros da LU-P-4201, entre Pacios e Mosteirovello. Ademais da renovación da estrada, construirase un paso elevado á altura do CEIP de San Miguel para reforzar a seguridade viaria nun punto especialmente frecuentado polo alumnado.
Obras adxudicadas en catro concellos
A Xunta de Goberno tamén deu luz verde á adxudicación de tres proxectos que suman 814.108 euros.
En Taboada rehabilitaranse os primeiros 6,1 quilómetros da LU-P-6001, que comunica a capital municipal con Mundín por Ada. En Palas de Rei e Friol renovaranse varios treitos da LU-P-4004, unha vía utilizada por explotacións gandeiras, establecementos de turismo rural e diferentes núcleos de poboación. Pola súa banda, en Chantada executarase a rehabilitación integral dos máis de 3,7 quilómetros da LU-P-1819, que conecta as parroquias de Quinzán das Peras e Mundín.
Todas estas actuacións inclúen a mellora da drenaxe, a renovación do firme e a reposición da sinalización, cun prazo de execución previsto de catro meses.
Nova maquinaria para o mantemento das estradas
Xunto aos investimentos na rede viaria, a Deputación licitou a adquisición dunha escavadora de cadeas de goma por un importe de 159.720 euros. O novo equipamento permitirá reforzar os traballos de conservación das infraestruturas provinciais, especialmente na limpeza de cunetas, movemento de terras e mantemento de camiños e estradas, co obxectivo de dar unha resposta máis rápida ás necesidades dos concellos.
