Santiago de Compostela viviu este luns unha xornada marcada pola emoción e orgullo colectivo coa chegada de Borja Iglesias, recente campión do mundo coa selección española. O dianteiro, que creceu profesionalmente na capital galega, regresou á súa cidade para recibir un dobre recoñecemento institucional e cidadán que puxo en valor tanto a súa traxectoria deportiva como o vinculo afectivo que mantén con Compostela.
A recepción oficial tivo lugar no Pazo de Raxoi
No Salón do Pazo de Raxoi tivo lugar o acto institucional presidido pola alcaldesa Goretti Sanmartín, acompañada pola concelleira de Deportes, Pilar Lueiro. A rexedora destacou que o xogador de fútbol é máis que un campión subliñando os valores de compromiso, empatía e solidariedade que transmite dentro e fóra do campo.
Durante a recepción,o Concello entregoulle varios agasallos simbólicos, entre eles unha botella con terra dos campos de fútbol composteláns nos que deu os seus primeiros pasos, e un estoxo coa obra de Rosalía de Castro. O futbolista deixou tamén unha dedicatoria no Libro de Honra, reafirmando o seu afecto pola cidade. O dianteiro tamén compartiu unhas palabras dende o balcón de Raxoi, onde saudou aos centos de afeccionados que se achegaron ao Obradoiro para acompañalo nun momento tan especial.
O recoñecemento chega despois de que Borja Iglesias acadase o maior logro da súa carreira ao proclamarse campión do mundo no mes de xullo. Un fito que, segundo destacou a alcaldesa, simboliza o camiño iniciado nos campos de La Salle, Santiago e Conxo e que hoxe inspira ás novas xeracións.