A Casa da Cultura de Pontedeume acollerá o vindeiro 18 de xuño, ás 19.00 horas, o faladoiro Arredor do Té, unha actividade de sensibilización que pretende achegar á cidadanía a realidade do pobo saharauí e dar a coñecer a súa situación actual.
A sesión contará coa participación de activistas saharauís, que compartirán en primeira persoa a experiencia da poboación refuxiada nos campamentos de Tinduf, en Alxeria, ademais de abordar a historia do Sáhara Occidental e o labor de resistencia que mantén o seu pobo desde hai décadas.
Un espazo para o diálogo
O encontro desenvolverase arredor da tradicional cerimonia do té saharauí, un dos símbolos culturais máis representativos desta comunidade. A partir desta tradición, abrirase un espazo de diálogo para reflexionar sobre a desinformación, fomentar a interculturalidade e visibilizar a defensa dos dereitos humanos.
A actividade está organizada polo Fondo Galego de Cooperación e Solidariedade en colaboración coa Delegación da República Árabe Saharauí Democrática (RASD) en Galicia e SOGAPS.
