O Concello de Narón puxo hoxe en marcha unha nova iniciativa na celebración do Día Internacional do Libro e entregou un libro ás usuarias e usuarios do servizo de comedor do Centro Municipal de Maiores das Vivendas da Mariña. A obra “Álvaro Paradela, médico e escritor” foi o libro elixido para agasallar nesta ocasión ás persoas que se desprazaron ao Centro Comunitario das Vivendas da Mariña para recoller o seu menú diario.
Este libro sobre o médico e escritor Álvaro Paradela (1911-1979), é obra dos escritores Manuela Santalla e Juan Carlos Rico e foi editado en colaboración co Concello de Narón co obxectivo de dar a coñecer a vida e obra deste médico nado en Coruña, pero naronés de adopción, que exerceu a súa profesión durante anos na parroquia de Freixeiro.
