Ca chegada de decembro, chega o Nadal e con él unha chea de actividades para todos os públicos. En San Sadurniño, ademáis da decoración característica destas datas, o Concello lanza as campañas ‘Engalana o teu concello’ e ‘Polo Nadal, consumo local’. Desde Cultura lánzase o convite, ademais, para que a veciñanza recupere nestas datas o espírito tradicional do Nadal, con ritos coma o do tizón ou o costume de ganar o aguinaldo polas casas cantando panxoliñas.
A ceramista fenesa Carme Romero mantén aberta na galería municipal a súa mostra de figuras coas que lle rende tributo ás meigas galegas. ‘Meigas, sabias e mulleres boas’ pode visitarse ate mediados de mes nos horarios de atención ao público das oficinas municipais, de 8:30 a 14:30h, e tamén os venres entre as 17:00 e as 19:00h tendo á propia Romero como guía.
O 17 de decembro chega á Casa da Cultura ás 19:00 horas ‘Contos de Contrabando’. O actor Avelino González conduce este monólogo humorístico do que van gozar tanto a xente miúda como as persoas adultas. Nel vai narrándonos a historia e as aventuras de dous contrabandistas, el galego e ela portuguesa, entrelazando contos de amor e desexo con episodios da súa vída como comerciantes á marxe da lei en tempos de moitas necesidades. As entradas para a actuación, que chega da man da Rede Cultural da Deputación da Coruña, teñen un prezo xeral de 5 euros, aínda que as persoas titulares do Carné Xove ou maiores de 65 anos beneficiaranse dun billete reducido de 2,50 euros. Para reservar hai que chamar ao 616 332 919 ou mandar un correo a [email protected].
A compañía A Xanela trae o venres 23 de decembro un espectáculo infantil dirixido a familias con nenas e nenos a partir dos 3 anos chamado ‘O Apalpador e a nena sen medo’. A nena sen medo escríbelle ao Apalpador pedíndolle palabras que lle enchan o corazon e que lle axuden a soñar. Porén, preto da data en que virá o carboeiro do Courel, a pequena decátase de que esqueceu botar a carta na caixa do correo… e o resto teredes que velo na Casa da Cultura. Hai un máximo de 100 entradas dispoñibles, que se poden reservar de balde a través do 616 332 919 ou do correo [email protected]. Ao remate da obra, sobre as 19:00h, o Apalpador chegará á Praza do antigo Concello co seu zurrón cargado de castañas e lambetadas para agasallar as nenas e nenos, despois de visitar durante a xornada a EIM A Rolada, o Centro de Día e a residencia Suacasa.
E os Reis Magos de Oriente tamén se achegarán por San Sadurniño na tarde do día 5 de xaneiro, sen dúbida o día no que teñen máis traballo. Para recibilos como merecen, o Concello organizoulles unha festa que se desenvolverá no ximnasio do colexio desde as 17:00h con xogos, música e tamén unha merenda a base de chocolate e roscón. Melchor, Gaspar e Baltasar virán a última hora da tarde para recoller cartas e tomar nota mental das peticións de última hora que lles faga a cativería, antes de proseguir camiño polo resto da comarca e do mundo.
A última cita da programación de Nadal e Reis será a entrega dos premios correspondentes a ‘Engalana o teu concello’ e ‘Polo Nadal, consumo local’, as propostas coas que o Concello nos convida a decorar casas, negocios e espazos públicos, así como a facer compras -ou consumir- nos establecementos do municipio. Os premios decidiranse por sorteo o día 4 de xaneiro ás 12:00h no salón de plenos. O Concello contactará ese mesmo día coas persoas agraciadas para convidalas á entrega dos agasallos, que terá lugar o sábado 7 tamén ás 12:00h na Casa da Cultura.
Quen participe en ‘Engalana o teu concello’ deberá enviar tres fotos da decoración da vivenda, negocio ou espazo público antes das 14:00 horas do día 23 de decembro -ao whatsapp 616 332 919 ou a [email protected]. No apartado individual entrará na rifa de 12 vales de 50 euros canxeables no comercio local. Outros 6 vales para xantares ou ceas (5 persoas/vale) sortearanse na categoría de decoracións colectivas. Tamén se se sorteará un vale por un xantar ou cea para catro persoas entre os establecementos participantes na categoría de negocios. En canto á campaña de dinamización comercial ‘No Nadal, consumo local’, no caso das compras ou consumicións de ata 10 euros en calquera dos 25 negocios adheridos entrarase no sorteo de tres cestas de produto valoradas en 70€. Por pagos superiores a 10 euros recibiremos unha papeleta para o sorteo doutras tres cestas, cun valor individual de 140€.
Cómpre lembrar, por último, que durante as festas permanecerán iluminados distintos puntos da zona urbana de San Sadurniño e que nas parroquias aparecerán múltiples persoeiros e detalles co obxectivo de que a veciñanza poida sacar fotos canda eles: a figura do Apalpador situarase no exterior doLocal Social de Bardaos, a grande vaca de madeira feita por Paula Aneiros botará todo o Nadal pacendo na área recreativa de Santa Mariña do Monte, o lume do Nadal permanecerá aceso na Torre -Igrexafeita-, o boneco de neve dará a benvida ao Local Social de Lamas e os renos camparán diante da capela de San Cristovo, en Ferreira. En Naraío volverá dárselle un toque de luz ao castelo e, completando a decoración natalicia, nos arredores do Concello montarase o poboado do Nadal feito por Carlos García e Marina Goti.
Discussion about this post