A xornada de mobilizacións convocada este mércores na Coruña rematou cun balance de numerosas persoas feridas e detidas, segundo denunciaron organizacións participantes e colectivos xuvenís, que acusan á Policía dunha actuación «desproporcionada» contra manifestantes que participaban en concentracións de carácter pacífico.
A denuncia pública foi reforzada este xoves nunha rolda de prensa convocada pola Coordinadora de Mocidade Socialista nas inmediacións da Praza de María Pita, onde se presentaron imaxes e testemuñas das lesións sufridas por varias das persoas asistentes ás mobilizacións.
Segundo explicou a organización, entre as persoas afectadas atoparíanse estudantes, mozos traballadores e tamén menores de idade. As denuncias apuntan a golpes, hematomas, contusións e outros impactos, algún deles en zonas sensibles do corpo. As persoas convocantes consideran que a resposta policial excedeu amplamente o necesario para controlar a situación e denuncian un clima de «violencia e agresividade» durante a intervención.
Reclaman unha investigación dos feitos
Os colectivos convocantes reclamaron o esclaremento do acontecido e esixiron responsabilidades políticas polas actuacións policiais da xornada. As organizacións denuncian a situación de risco xerada polos policías innecesaria e piden que se investiguen as circunstancias nas que se produciron as cargas e as detencións. Así, expresaron a súa solidariedade coas persoas feridas e detidas, ao tempo que anunciaron que continuarán recompilando información e testemuños sobre os feitos ocorridos na cidade.
Galiza Nova chama a novas mobilizacións en toda Galicia
A organización xuvenil nacionalista Galiza Nova anunciou a convocatoria de concentracións e mobilizacións en diferentes localidades para denunciar o que considera un episodio de represión policial. O colectivo sinala que as novas convocatorias buscan expresar solidariedade coas persoas afectadas e visibilizar o rexeitamento ás actuacións policiais, co obxectivo de manter a mobilización social para reclamar explicacións polo acontecido.