Vimianzo acolle os días 8 e 9 de maio unha nova edición do encontro Alza Voz de Muller, organizado polo Concello de Vimianzo coa colaboración da Deputación da Coruña, e concibido como un espazo de referencia para o debate arredor do liderado feminino, o emprendemento e a igualdade no ámbito rural.
Tras a boa acollida da súa primeira edición, que reuniu a máis dun cento de mulleres procedentes de distintos puntos de Galicia, o foro regresa cun formato ampliado e cunha programación máis ambiciosa, na que se combinan relatorios, mesas de diálogo e talleres experienciais, coa participación de referentes estatais e galegas de ámbitos como o feminismo, a política, a comunicación e o emprendemento.
“Non estamos só presentando un evento, estamos reafirmando unha aposta”, sinalou na presentación oficial a alcaldesa de Vimianzo, Mónica Rodríguez, quen puxo en valor a necesidade de crear espazos que dean visibilidade e recoñecemento ao talento feminino que xa existe no territorio. Na mesma liña, a deputada provincial de Emprego, Rosa Ana García, destacou o papel das mulleres como motor de cambio no rural, ao tempo que advertiu de que aínda persisten importantes dificultades para acadar unha igualdade real nos espazos de decisión..
Debate, reflexión e moitas experiencias
A programación de Alza Voz de Muller estrutúrase arredor de relatorios, mesas de diálogo e talleres experienciais que buscan avanzar do diagnóstico á acción. O enfoque é claro: poñer sobre a mesa aquelas barreiras estruturais que seguen condicionando as traxectorias profesionais das mulleres e xerar ferramentas colectivas para afrontalas desde o territorio.
A xornada do venres 8 de maio arrancará ás 15.30 horas coas acreditacións e un café de benvida, antes da inauguración institucional. A continuación, unha intervención marco abrirá o debate baixo a pregunta “Por que necesitamos espazos coma este?”, situando o sentido do foro nun contexto de desigualdades aínda persistentes, especialmente no ámbito rural.
Ás 16.45 horas terá lugar a ponencia inaugural, a cargo de Nuria Varela, xornalista, escritora e unha das voces máis influentes do feminismo contemporáneo no Estado. Autora de obras de referencia como Feminismo para principiantes, Cansadas ou O síndrome Borgen, Varela reflexionará sobre o esgotamento colectivo e a necesidade de respostas compartidas no relatorio “Cansadas de estar cansadas: respostas colectivas a desafíos estruturais”.
A tarde continuará con dúas mesas de diálogo. Ás 17.30 horas, “O sistema non é neutro: barreiras invisibles no emprendemento e no emprego” analizará como a desigualdade se reproduce baixo formas aparentemente neutras. Ás 18.30 horas, o foco poñerase no territorio con “Emprender dende o rural: talento, invisibilidade e resistencia”, unha conversa sobre oportunidades, dificultades e resiliencia fóra dos grandes núcleos urbanos.
Poder, visibilidade e sostemento na xornada do sábado
O sábado 9 de maio concentrará o groso da programación. Tras a apertura de portas ás 9.30 horas, a primeira mesa do día, ás 10.00 horas, abordará un dos temas máis sensibles do foro: “Facer política sendo muller: poder, exposición e responsabilidade”, unha reflexión sobre a presión, a vixilancia e a sobreexposición que seguen acompañando ás mulleres nos espazos de decisión pública.
Ás 11.00 horas tomará a palabra Gemma Fillol, autora, conferenciante e experta en comunicación emocional con máis de vinte anos de traxectoria. Baixo o título “Non é casual o poder do ritual: o poder dos rituais nun mundo que nos quere esgotadas”, Fillol propoñerá repensar os ritmos, os coidados e as formas de liderar nun contexto que empurra cara ao esgotamento constante.
Tras a pausa café, ás 12.30 horas, chegará unha das reflexións máis ligadas ao presente dixital. Nuria Robleño, emprendedora e fundadora de varios proxectos, analizará a importancia da visibilidade online no relatorio “Se non te ven, non existes: visibilidade, marca persoal e exposición dixital”, afondando na construción de autoridade e marca persoal en contornas saturadas.
Despois da pausa para o xantar, a tarde retomarase ás 15.30 horas coa mesa “Chegar, sosterse e medrar: o prezo e o poder de liderar sendo muller”, centrada no que acontece unha vez se acadan postos de responsabilidade: como soster proxectos no tempo e a que custo persoal e profesional.
Como novidade desta edición, a partir das 16.30 horas desenvolveranse talleres experienciais en paralelo, deseñados para fomentar a participación activa e o traballo en pequeno grupo. O foro pecharase ás 18.00 horas coa dinámica colectiva “E agora que? Redes, alianzas e futuro compartido”, orientada a fortalecer vínculos, tecer alianzas e trasladar o aprendido máis alá do evento.
Un foro con vocación de impacto territorial
Desde o Concello de Vimianzo explican que Alza Voz de Muller naceu coa vontade de crear espazos seguros nos que compartir experiencias reais, pero tamén para xerar referentes, redes e oportunidades desde o rural, reforzando o tecido económico e social do territorio desde unha perspectiva feminista.
Unha visión que comparte a Deputación da Coruña, que ve neste tipo de iniciativas unha panca estratéxica para o desenvolvemento local, a fixación de poboación e a promoción da igualdade real. Con esta segunda edición, Alza Voz de Muller confirma a súa evolución: de foro emerxente a cita consolidada, capaz de conectar reflexión, experiencia e acción colectiva, e de situar o liderado feminino no rural como un eixo central de presente e futuro.
